Plantun de Prouvènço

Pèr coumpara dos planto d'encò nostre

Euphorbia flavicoma subsp. verrucosa & Euonymus europaeus

Euphorbia flavicoma subsp. verrucosa

Euphorbiaceae

Nom en français : Euphorbe verruqueuse.

Descripcioun :
Lachusclo que se recounèis bèn quouro es en fru, emé si gros boursoun berruquous. Pòu èstre sènso péu o mai o mens peludo. Trachis en mato dins li relarg pulèu secarous pèr la subsp. flavicoma o lis endré mai umide pèr la subsp. verrucosa qu'es eici presentado. Aquesto éi mai grando dins tóuti si partido, majamen li fueio (2,5 x 1 cm eici, e 1,5 x 0,5 cm pèr flavicoma).

Usanço :
Coume tóuti lis meno d'Euphorbia, la lachusclo-berrugouso es uno planto empouisounanto. Lou la que s'escoulo à la coupo èi di proun irritant pèr la pèu, lis iue e la bouco.

Port : Erbo
Taio : Pancaro entresigna
Fueio : alterno
Tipe bioulougico : Emicriptoufite
Cicle bioulougico : Planto renadivo

Gènre : Euphorbia
Famiho : Euphorbiaceae

Ordre : Malpighiales

Coulour de la flour : Verdo
Petalo : ges
Ø (o loungour) flour : Pancaro entresigna
Flourido : Printèms - Estiéu

Sòu : Ca
Autour basso e auto : 0 à 1800 m
Aparado : Noun

Liò : Ribiero - Roubino
Estànci : Termoumediterran à Mountagnard
Couroulougi : Pancaro entresigna
Ref. sc. : Euphorbia flavicoma subsp. verrucosa (Fiori) Pignatti, 1973 (= Euphorbia verrucosa subsp. verrucosa L., 1753 )

Bounet-de-capelan

Euonymus europaeus

Celastraceae

Àutri noum : Fusan, Coulougnet, Grano-pesoulino.

Noms en français : Fusain, Fusain d'Europe.

Descripcioun :
Lou bounet-de-capelan es un aubret que trachis dins li relarg fres e proche d'aigo. Fai de fueio longo de 2 à 10 cm e de pichòti flour en crous de 6 à 10 mm. Mai se recounèis subretout emé si fru que sèmblon li bounet que pourtien, à passa tèms, li capelan. Aquéli soun roso e quàsi redoun sus lou dessubre e caupon 4 grano. Coumpara emé lou bounet-de-capelan-di-làrgi-fueio qu'èi pentamèro.

Usanço :
Couneissèn pas d'usanço particuliero en Prouvènço pèr aquelo planto. Pamens se saup qu'es emé soun bos cabounisa que se fai lou fusan pèr lou dessin. Dins d'ùni relarg se servien di fru pèr tencha en rouge.